MICHEZO

Kama vipi mpeni Wenger Kagawa muone

 

 MANCHESTER, ENGLAND

ASIA nzima ilisubiri kumtazama Shinji Kagawa akicheza Anfield, lakini dah! haikuwa hivyo.

Wamekerwa wengi, Wajerumani wa Borussia Dortmund na hata wapenzi wa kuwatuza viungo waongo waongo ndani ya uwanja.

‘Free Shinji’, kampeni hii ya mashabiki wa Dortmund na Wahispania inafahamu uwezo wa miguu wa Mjapani huyo na kile Manchester United inachomfanyia. Borussia Dortmund wanamtaka mtu wao.

Kuna tofauti kubwa kati ya Manchester United na klabu nyingine linapokuja suala la sifa za nje ya uwanja. Wakati Kagawa alipowekwa benchi nchini Ujerumani, nje ya Ruhr na Japan, ni watu wachache walilitambua hilo.

Lakini, akikaa benchi Old Trafford, dunia nzima inatambua. Hasa kwa mchezaji wa kiwango na kipaji kama chake, hilo litawagusa wengi, ukizingatia staili ya uchezaji wa Manchester United inahitaji mtu kama yeye ndani ya uwanja.

Alipokaa benchi dhidi ya Swansea ilieleweka kwasababu staa huyo alikuwa kwenye mechi ya kimataifa ya Japan katikati ya wiki, lakini aliposugua pia kwenye mechi dhidi ya Chelsea, hilo limeumiza watu.

Kuna wanaosema kwamba bado hayupo kwenye kiwango bora, lakini kwenye kikosi cha Japan alicheza kwa dakika zote 90 na kufunga katika mechi dhidi ya Uruguay.

Hivyo basi, hata kama hakuwa fiti kwa dakika zote, bado alipaswa kucheza walao kwa dakika 15 hadi 20 kwenye mechi hiyo ya Chelsea, kitu ambacho hakikutokea.

Kocha wa Borussia Dortmund, Jurgen Klopp, amesema Kagawa ni kati ya wachezaji bora duniani, hivyo yanamtoka machozi kuona anabwagwa benchi.

Mashabiki kutoka sehemu mbalimbali duniani waliguswa kuona mchezaji huyo amekosa nafasi ya kucheza kwenye mchezo dhidi ya Chelsea.

Aliwekwa kando si tu mwanzoni mwa mchezo, hata Manchester United ilipofanya mabadiliko, ilichagua kuwaingiza Ashley Young na Ryan Giggs, yeye akiendelea kubaki benchi.