MICHEZO

LEO SPURS v CHELSEA, BIFU AVB, MOURINHO LATOKOTA!! 

>>AVB: ‘SPURS UPO UWEZO KUPIGANIA UBINGWA!’

LEO, White Hart Lane itawaka moto wakati wa Mechi ya Ligi Kuu England kati ya Tottenham na Chelsea ambayo inawakutanisha Marafiki wa zamani, Mameneja Andre Villas-Boas na Jose Mourinho, ambao kwa sasa upo ufa mkubwa kati yao.

Mbali ya upinzani ndani ya Uwanja ambapo Tottenham wapo Nafasi ya Pili, Pointi sawa na Vinara Arsenal, na Chelsea wako Nafasi ya 4, Pointi 2 nyuma ya Tottenham, nje ya Uwanja Wiki hii yote Mechi hii imekolezwa na uhasama kati ya Mameneja wa Timu hizi mbili ambao waliwahi kufanyakazi pamoja kwa muda mrefu.

Kwa Kipindi cha Miaka 7, AVB na Mourinho walikuwa Mtu na Msaidizi wake huko Klabu za FC Porto, Chelsea na Inter Milan na ndipo wakatengana na Andre Villas-Boas kurudi FC Porto na kutwaa Ubingwa na Kombe la Ureno pamoja na EUROPA LIGI katika Msimu mmoja na kisha kuhamia Chelsea Mwaka 2011 kumrithi Carlo Ancelotti.

Majuzi, AVB alidokeza kuwa yeye na Mourinho hawana uhusiano na hapotezi usingizi kwa kutengana kwao na chanzo cha ugomvi wao ni Mourinho kumnyima nafasi ya kuwajibika zaidi walipokuwa wote Inter Milan.

Nae Mourinho amejibu mapigo kwa kwa kumsema AVB anakuwa kama ‘Mtoto’ kwa kuongea kwenye kadamnasi badala ya kukutana uso kwa uso na kumaliza bifu lao.

SPURS NA UBINGWA

Wakati huo huo, Andre Villas-Boas anaamini kuwa Tottenham sasa inao uwezo wa kupigania kunyakua Ubingwa kwa vile Kikosi chao kimeimarika zaidi.

Baada kutumia Pauni Milioni 103 kabla Msimu huu kuanza kwa kununua Wachezaji 7 wapya, Spurs imeshinda Mechi 8 kati ya 9 ilizocheza na sasa wako Nafasi ya Pili kwenye Ligi.

Tottenham hawajatwaa Ubingwa wa Daraja la Juu England tangu Mwaka 1961 lakini Msimu huu, Meneja wa Tottenham, AVB, anaamini mambo yanaweza kuwa tofauti.

Ametamka: “Inaonekana ni hivyo. Hakuna Timu iliyonyakua Pointi zote kwenye Ligi. Mabingwa Man United wanahangaika ingawa Ratiba yao ya mwanzo ni ngumu kupita Timu yeyote. Man City wamefungwa Cardiff na kutoka Sare na Stoke. Sie Jumamosi tunaweza kutoka tumefungwa Mechi mbili au Chelsea ikawa wao wamefungwa Mechi mbili. Msimu huu unaonyesha kuwa hivyo, usiotabirika!”

Miongoni mwa Wachezaji wao wapya, Roberto Soldado amefunga Bao 4 katika Mechi 6, Paulinho na Christian Eriksen wametamba kwenye Kiungo.

Kuimarika kwa Kikosi cha Tottenham kulidhihirika Jumanne iliyopita kwenye Capital One Cup ambapo Timu iliyobadilishwa Wachezaji 8 iliinyuka Aston Villa Bao 4-0 tena Ugenini huku Mkongwe wao Jermaine Defoe akiwa Nyota kwa kupiga Bao 2.

Ingawa Kikosi kinaonekana kimeimarika, Spurs inao Mastraika wakubwa wawili tu, Defoe na Soldado, na imebidi wamrudishe tena Emmanuel Adebayor kwenye Kikosi cha Kwanza baada ya kutupwa kwenye Kikosi cha Akiba kufuatia kutokuwepo Mazoezini baada kukumbwa na matatizo ya kibinafsi huko kwao Togo.

++++++++++++++++++++++++++++

RATIBA:

BPL: LIGI KUU ENGLAND

Jumamosi 28 Septemba

14:45 Tottenham Hotspur v Chelsea

17:00 Aston Villa v Manchester City

17:00 Fulham v Cardiff City

17:00 Hull City v West Ham United

17:00 Manchester United v West Bromwich Albion

17:00 Southampton v Crystal Palace

19:30 Swansea City v Arsenal

Jumapili 29 Septemba

15:30 Stoke City v Norwich City

18:00 Sunderland v Liverpool

Jumatatu 30 Septemba

22:00 Everton v Newcastle United